Ekkert mark er nógu stórt!
06.07.2016Blikastelpur tóku á móti nágrönnum sínum í HK/Víking í 8 liða úrslitum í Borgunarbikarnum í gærkveldi á Kópavogsvelli. Byrjunarlið Blika var hefðbundið fyrir utan að Fanndís Friðriks var í leikbanni vegna Rauðs spjalds sem hún fékk í 16 liða úrslitum á móti Keflavík. En liðið var þannig skipað:
Sonný Lára
Ásta-Guðrún-Fríða-Hallbera
Fjolla-Andrea-Rakel
Arna Dís-Esther-Svava Rós
Það er skemmst frá því að segja að yfirburðir Blika voru algerir frá fyrstu mínútu og gestirnir úr Fossvogi komust varla yfir miðju í öllum fyrri hálfleiknum, Blikar fengu urmul marktækifæra en það gekk erfiðlega að hitta ramman og þau skot sem náðu þangað lentu flest í öruggum höndum Bjarkar Björnsdóttur markvarðar gestanna. Það var þó á 37 mínútu leiksins að blikar náðu góðri sókn sem endaði með góðu marki frá Örnu Dís og staðan 1-0 i hálfleik. Í hálfleik fékk Jóhannes Karl þjálfari HK/Víkings að líta rauða spjaldið fyrir kjaftbrúk við dómara leiksins og gestirnir því án aðalþjálfara síns í síðari hálfleik.
Síðari hálfleikur var spegilmynd þess fyrri. Blikar með boltan allan tímann en ekkert gekk að koma tuðrunni framhjá Björk í markinu. Allst áttu Blikar 25 marktilraunir í leiknum en Gestirnir enga. Blikar fengu 19 hornspyrnur en HK eina á lokamínútum leiksins. Þrátt fyrir nauman sigur þá er óhætt að segja að sigurinn var í raun aldrei í hættu því engin hætta skapaðist af gestunum nokkurn tíman í leiknum. Og það góða við bikaleiki er að markatala skiptir ekki máli. Sigur vannst og stelpurnar komnar í undanúrslit bikarsins.