Alexandra Jóhannsdóttir gengur til liðs við Breiðablik.
31.10.2017
Hin unga og gríðarlega efnilega, Alexandra Jóhannsdóttir, hefur gengið til liðs við Breiðablik og skrifaði í dag undir 3 ára samning við félagið. Alexandra sem er 17 ára gömul hefur leikið með Haukum alla sína tíð og á þrátt fyrir ungan aldur 41 leik í meistaraflokki í deild og bikar. Í þessum leikjum hefur hún skorað 8 mörk. Auk þess á Alexandra 29 landsleiki með U17 og U19 landsliðum Íslands og hefur hún þar náð að skora 10 mörk. Þrátt fyrir að vera aðeins 17 ára þá hefur hún verið fyrirliði í U19 undanfarið.
Við Blikar viljum nota tækifærið og þakka Haukum sértaklega fyrir lipurð og skilning í tengslum við þessi vistaskipti þar sem sameiginlegir hagsmunir félaganna og leikmannsins voru hafðir að leiðarljósi og ljóst að samstarf félaganna mun í framhaldi af þessu eflast til framtíðar.
Blikar fagna þessum spennandi liðsauka og bjóða Alexöndru hjartanlega velkomna í Kópavoginn