Selma Sól til Noregs
20.01.2022
Breiðablik hefur samþykkt tilboð frá Rosenborg í Selmu Sól Magnúsdóttir og hefur hún náð samkomulagi um tveggja ára samning við norska liðið. Selma Sól er 23 ára gömul, Bliki í húð og hár og spilaði sinn fyrsta leik með liðinu í efstu deild árið 2013, aðeins fimmtán ára gömul. Síðan þá eru leikirnir orðnir 137 og mörkin 27 í öllum keppnum.
Vi forsterker med den islandske landslagsspilleren Selma Sól Magnúsdóttir✍️⚽️https://t.co/9IZxqh8gU5
— Rosenborg BK Kvinner (@RBKvinner) January 20, 2022
Selma Sól hefur verið í lykilhlutverki með Blikum síðustu ár og unnið allt sem hægt er að vinna í Kópavoginum. Hún hefur jafnframt spilað sextán A-landsleiki og áður fjölda leikja með yngri landsliðum. Hún lagði hart að sér að koma til baka eftir erfið meiðsli sem hún lenti í fyrir tveimur árum og það er því sérlega gleðilegt að sjá hana taka skrefið út í atvinnumennsku.
Blikar óska Selmu alls hins besta í Noregi en hún hefur verið frábær liðsmaður í Kópavoginum og mikil fyrirmynd jafnt innan sem utan vallar.
Gangi þér vel Selma Sól
Mynd: Hafliði /Fótbolti.net