Næsti leikur bikarmeistarana á föstudag
20.08.2025
Næsti leikur hjá nýkrýndum bikarmeisturum verður á föstudaginn klukkan 19:00 á Kópavogsvelli gegn Tindastól svo að stelpurnar okkar fá nú aðeins fleiri daga á milli leikja sem er gott enda hefur verið mikið álag undanfarið.
Liðin hafa 7 sinnum att kappi í bestu deild og hafa okkar konur borið sigur úr býtum í öll skiptin með markatöluna 20-2. Hins vegar er það svo að sagan segir ekki allt. Tindastóll hefur verið á siglingu og í síðustu 3 umferðum hafa þær unnið tvo leiki og einungis tapað á móti sterku liði FH í síðustu umferð en unnið Þór/KA og FHL í umferðunum þar á undan. Það er ljóst að ekki dugar að mæta með einhverja bikarþynnku í leikinn því að Tindastólsstúlkur munu leggja allt í sölurnar til að ná í hagstæð úrslit.
Þetta verður síðasti leikur stelpnanna í mótinu fyrir Evrópukeppnina en þær munu spila á móti Írska liðinu Athlone Town þann 27. ágúst erlendis. Seinni leikur þeirra verður svo 30. ágúst en það fer eftir því hvernig fyrri leikurinn fer við hverja þær spila í seinni leiknum. Það eru einungis fjórir leikir eftir þar til kemur að úrslitakeppninni og þurfa stelpurnar okkar að leggja allt í sölurnar til að tryggja sigur í leiknum því það er alveg ljóst eftir leikinn á laugardag að FH stúlkur munu veita okkur harða keppni í deildinni allt til loka og hvetjum við því alla að mæta og hvetja okkar konur áfram. Þær eiga það svo sannarlega skilið. Áfram Breiðablik!
-B