Miðjumaðurinn Juan Camilo Pérez til Blika
19.11.2021/2021/Juan_Camilo_Pérez_crop_600_564.jpg)
Miðjumaðurinn öflugi Juan Camilo Pérez hefur gert tveggja ára samning við knattspyrnudeild Breiðabliks. Juan Camilo, sem er 22 ára gamall, er örvfættur leikmaður sem getur leikið margar stöður á vellinum. Hann býr yfir miklum hraða og er afar leikinn með boltann.
Juan Camilo kemur frá Carabobo FC í Venezuela en hann hefur einnig leikið með Atlético Venezuela og Deportivo La Guaira. Blikar hafa fylgst með þessum leikmanni í töluverðan tíma og mun hann koma til landsins strax eftir áramótin.
Óskar Hrafn Þorvaldsson þjálfari Blika er spenntur að fá Pérez í hópinn. ,,Við erum mjög ánægðir með að hafa fengið Juan Camilo í okkar raðir. Við höfum fylgst með honum töluverðan tíma og teljum að hann muni styrkja Breiðabliksliðið mikið bæði sóknar- og varnarlega. Hann hefur alla þá eiginleika sem við leitum að í leikmönnum, er ungur, orkumikill, fljótur og ákveðinn og við hlökkum til að fá hann til okkar í byrjun janúar" sagði Óskar Hrafn.
Við bjóðum Juan Camilo hjartanlega velkominn í Kópavoginn.
/2021/FEhDMp6XEAgIbr4_600_338.jpg)
Juan Camilo gerir tveggja ára samning við Breiðablik