Jafntefli í Grindavík: Umfjöllun

08.08.2011

Liðin í 9. og 10. sæti deildarinnar mættust í 6 stiga leik í Grindavík í gærkvöldi. Bæði lið vildu gera allt til að ná öllum þremur stigunum. Grindvíkingar vissu vel að með sigri myndu þeir komast upp að hlið Blika en ef Breiðablik hefði sigur væru stigin milli liðanna orðin 6 talsins.

Byrjunarlið

Kale

Arnór - Kári - Þórður - Kiddi Jóns

Jökull - Finnur

Tómas Óli - Gummi Kri - Kiddi Steindórs

Dylan

Fyrri hálfleikurinn var algjörlega eign Blika og hefðum við átt að skora að minnsta kosti 2-4 mörk í honum en urðum að láta bombu Kidda Jóns okkur nægja. Kiddi Jóns hamraði boltann upp í markvinkillin og kom Blikum yfir 0-1. Með þennan öfluga vinstri fót er í raun með ólíkindum að Kiddi skuli ekki skora í hverjum einasta leik. Héðan í frá legg ég til að Kiddi Jóns taki að sér að skora í að minnsta kosti 50% tilfella þegar við fáum aukaspyrnu í skotfæri.

Kristinn Steindórs lét svo reyna á Óskar Pétursson í marki Grindavíkur. Kiddi áttu lúmskt skot úr aukaspyrnu sem hafnaði í stönginni. Menn héldu að Jónsson væri að fara negla aftur en Kiddarnir eru varasamir með meiru.

Dylan átti líka fínt færi en hann kom boltanum ekki fram hjá Ólafi Erni Bjarnasyni sem bjargaði á línu.

Staðan 0-1 fyrir Blika í hálfleik og allt leit bara þokkalega vel út. Blikar sterkari aðilinn í leiknum og með fleiri færi.

Inn gengu liðin og út komu þau aftur um það bil korteri síðar. Þá var eins og Grindvíkingar hefðu snætt harðfisk og drukkið lýsi en Blikar pantað sér eina 16 tommu með pepp og svepp. Heimamenn voru miklu grimmari og ákveðnari en Blikar hálfværukærir. Það vantaði enn eina ferðina baráttu og vilja til að klára leikinn með öðru og þriðja markinu. Grindvíkingar jöfnuðu metin og var þar á ferðinni gamla brýnið Scott Ramsey sem kláraði snaggaralega sókn Grindavíkur og renndi boltanum undir Kale eftir sendingu frá Alexander Magnússyni.

Eftir markið var eins og liðin hefðu ekki í sér að skora sigurmarkið. Þorðu ekki að taka of mikið af sénsum, mögulega vegna hræðslu um að fá mark í bakið.

Lokaniðurstaða í Grindavík 1-1 jafntefli og bæði lið hrósuðu happi með að hvorki Fram né Víkingur náðu sér í 3 stig.

Fótur leiksins var vinstri fóturinn á Kidda Jóns sem vaknaði úr dvala og er tilbúinn í slaginn það sem eftir er sumri

Næsti leikur er gegn Eyjamönnum á Kópavogsvelli í fyrra mættu vel yfir 3000 manns á völlinn þegar þessi lið áttus við það væri gaman að fylla allaveganna nýju stúkuna alveg í þessum leik.

Athugið að leikurinn er á heldur óvenjulegum tíma. Klukkan 18:00 á mánudeginum 15. ágúst.

GMS

<- Til baka