• FRÉTTIR

Grindavík - Breiðablik í PEPSI sunnudaginn 17. september kl. 16:00

Blikar skella sér suður með sjó á sunnudaginn til að etja kappi við sprækt lið Grindvíkinga í 20. umferðar Pepsi-deildar karla. Liðin verma nú 6. og 7. sæti stigatöflunnar með 24 og 25 stig. Bæði lið töpuðu leikjum sínum í 18. umferð og þurfa því stig til að gulltryggja áframhald í deildinni.

Sagan

Heildarfjöldi innbyrgðis viðureigna liðanna í öllum mótum er 42 leikur. Grindvíkingar hafa sigrað 17 leiki, Blikar 15 leiki og í 9 leikjum er jafntefli niðurstaðan.

Grindavíkurgrýlan

Á árunum 1985 til 1993 gekk Blikum bölvanlega að ná úrslitum gegn Grindavík – sérstaklega í Grindavík. Fyrsti mótsleikur liðanna var í 2. umferð Bikarkeppni KSÍ í júní 1985. Leikurinn fór fram á Kópavogsvelli og tapaðist 0-1. Annar leikur liðanna,árið 1988, líka í Bikarkeppni KSÍ, tapaðist 2-0 í Grindavík. Og þriðji leikur liðanna, árið 1989, var einnig í Bikarkeppni KSÍ og tapaðist 3-2 á heimavelli Grindvíkinga. Fyrsti sigur okkar manna var í B-deildinni á Kópavogsvelli árið 1990, en Blikar tapa seinni leiknum í Grindavík 1-0. Næsti leikur liðanna var 3-1 sigur Grindjána í undanúrslitum í Litlu Bikarkeppninnar í Grindavík árið 1993. Eftir 5 töp í röð gegn Grindavíkurliðinu í Grindavík á árunum 1985-1993 kom loksins góður 0-3 sigur í B-deildinni í Grindavík. Þar með var álögunum, sem leikmenn töldu sig vera undir, aflétt enda sagði þáverandi þjálfari Breiðabliks, Ingi Björn Albertson, á töfluæfingu fyrir leikinn “Ég hef aldrei tapað fyrir Grindavík” og að því búnu var ekið sem leið liggur til Grindavíkur og Ingi Björn barði sína menn áfram til sigurs með mörkum frá Jóni “Bonna” Jónssyni, Willum Þór Þórssyni og Sigurjóni Kristjánssyni.

Reyndar kom annað 4 leikja tímabil, allir í A-deild á árunum 1999 til 2006, þar sem við Blikar náðum ekki að sigra. Árið 1999 töpuðum við 1-0, töpum 3-0 árið eftir og svo 2-1 tap árið þar á eftir. Næsti leikur liðanna í Grindavík er svo ekki fyrr en árið 2006 - sá leikur tapaðist nokkuð stórt eða 4-2, en Blikar hafa ekki tapað í Grindavík síðan. 

Efsta Deild

Fyrsta innbyrgðis viðureig liðanna í efstu deild (Sjóvá-Almennra deildin) var leikinn á Kópavogsvelli 20. júlí. Leiknum lauk með markalausu jafntefli. Nánar um leikinn (myndband). En innbyrgðis viðureignir liðanna í efstu deild eru 23 leikir. Breiðablik hefur sigrað 7 viðureignir, Grindvíkingar 10 viðureignir og 6 viðureignir enda með jafntefli.

Sagan er því með liði Grindavíkur bæði á þeirra heimavelli í Grindavík og á Kópavogsvelli. Grindvíkingar hafa unnið 5 sinnum í Grindavík, Blikar hafa unnið 3 leiki og jafnteflin eru 3. Á Kópavogsvelli hefur Grindavík vinninginn með 5 sigra,  gegn 4 sigrum Blika. Jafnteflin eru 3.

Blikar töpuðu síðast í Grindavík árið 2006 og hafa unnið 3 af síðustu 5 viðureignum liðanna í efstu deild síðan þá. Árið 2012 vinna Blikar 2-4 sigur , 2011 er 1-1 jafntefli , 2010 vinna Blikar 2-4 sigur , 2009 vinna Blikar 0-1 sigur og 2008 gera liðin 2-2 jafntefli. 

Markaregn!

Liðin hafa skorað samtals 86 mörk í 23 inbyrgðisleikjum í efstu deild. Leikir liðanna árin 1995 og 1996 enduðu með markalausu jafntefli: 

2012: 2-0  2011: 2-1  2010: 2-3  2009: 3-0  2008: 3-6  2006: 2-3  2001: 2-4  2000: 3-4  1999: 4-1

Fjórða viðureign liðanna á þessu ári

Liðin mættust í Lengjubikarnum í lok febrúar á þessu árið. Leikið var í Fífunni og lauk leiknum með 1-1 jafntefli þar sem Gunnleifur og Davíð Kristján redduðu stigi fyrir Blika. Sjá umfjöllun Blikar.is. Og hér má sjá glæsilegt mark Davíðs Kristjáns og markvörslu Gunnleifs Gunnleifssonar.

Liðin mættust einnig í leik um um 5. sæti í Fótbolta.net mótinu 2017. Leikið var í Fífunni í byrjun mars og lauk leiknum með 1-1 jafntefli. Það þurfti því vítaspyrnukeppni til að fá úrslit sem Grindavik vann 4-3. Sjá nánar.

Og í lok júní mættust liðin í fyrri umferð PEPSI. Þeim leik lauk með gallsúru 0-0 jafntefli eins og pistlahöfundur blikar.is orðaði það. Sjá umfjallanir um þann leik hér.

Liðið okkar þarf að sækja stig til Grindavíkur á sunnudaginn. Það er stutt í botninn. Ef við vinnum þá gulklæddu spyrnum við okkur frá neðri hluta töflunnar. 

Leikurinn í Grindavík á sunnudaginn hefst klukkan 16:00!

Áfram Breiðablik, alltaf, alls staðar!

Til baka