Viðurkenningarskjal afhent 2019: Íslands-og bikarmeistari 1981
Upplýsingar og heimildir um kvennalið Breiðabliks fyrstu 10 árin.
Vorið 1968 fóru að koma út á Vallargerðisvöll hópur af stelpum til að leika sér í fótbolta. Um sumarið tók Guðmundur Þórðarson að sér þjálfun hópsins og varð þar með fyrsti þjálfari í knattspyrnu kvenna hjá Breiðabliki. Árið eftir er Ægir Guðmundsson orðinn aðstoðarmaður Guðmundar og sáu þeir saman um æfingar hópsins, en á fyrsta Íslandsmótinu,1972, stýrði Ægir Guðmundsson liði Breiðabliks í fyrsta leik Íslandsmóts kvenna í knattspyrnu í leik gegn Fram á Vallargerðisvelli 28. ágúst 1972.
Þjálfarar fyrstu árin. 1968 Guðmundur Þórðarson. 1970-1972 Ægir Guðmundsson. 1973-1974 Halldór Sigurðsson. 1975-1977 Haraldur Erlendsson. 1978 Gissur Guðmundsson. 1979-1980 Guðmundur Þórðarson. 1981-1982 Sigurður Hannesson.
Í upphafi var fyrirkomulag Íslandsmóts kvennaliða á marga vegu. Fyrstu 5 árin var fyrirkomulagið tveir 3-liða riðlar og úrslitaleikur um Íslandsmeistaratitilinn. Árið 1977 breytist fyrirkomulagið í 5 liða deild en svo aftur breytt í fyrra horf. Riðlafyrirkomulaginu var ekki hætt fyrr en eftir keppnistímabilið 1984.
Samhliða þátttöku í Íslandsmótinu í knattspyrnu utanhúss frá upphafi (1972) og bikarkeppni KSÍ (1981) tók Breiðabliksliðið þátt í öðrum mótum. UMSK mót (1973), bæjarkeppni við Akranes (1974), Bautamótið á Akureyri (1981), ID mótið í Danmörku og Litla bikarkeppnin (1982).
1975 fara Blikakonur í ferð til Skotlands og spiluðu þar sinn fyrsta knattspyrnuleik erlendis. Kvennalið Breiðabliks tók þátt í Íslandsmótinu innanhúss frá upphafi og vann liðið sinn fyrsta innanhússtitil árið 1976. Fyrsti titillinn utanhúss kom árið 1977. Breiðablikskonur hafa tekið þátt í bikarkeppi KSÍ óslitið frá upphafi keppninnar árið 1981.
Aðstoð við efnisöflun: Rósa Á. Valdimarsdóttir sumarið 2025.
