Steini tilnefndur sem þjálfari ársins
23.12.2018Þorsteinn Halldórsson, þjálfari kvennaliðs Breiðabliks, er einn þriggja er koma til greina sem þjálfari ársins af Samtökum íþróttafréttamanna árið 2018.
Þorsteinn stýrði Blikaliðinu til Íslands- og bikarmeistaratitils síðastliðið sumar og vann liðið þar með tvennuna þetta tímabilið. Þetta var jafnframt í annað sinn sem Þorsteinn vinnur þessa titla með Blikum eftir að hafa gert liðið að Íslandsmeistara 2015 og bikarmeistara árið eftir.
Tilnefningin er önnur rósin í hnappagat Þorsteins á skömmum tíma, en fyrr í mánuðinum var hann kjörinn þjálfari ársins í meistaraflokki kvenna á aðlafundi Knattspyrnuþjálfarafélags Íslands.
Þjálfari ársins verður útnefndur í hófi Íþróttamanns ársins þann 29. desember, en ásamt Þorsteini eru þeir Arnar Pétursson og Kristján Andrésson tilefndir. Arnar gerði karlalið ÍBV að þreföldum meisturum í handknattleik á árinu og Kristján vann silfurverðlaun með karlalandslið Svíþjóðar á EM í handknattleik.