Falskur söngur í Kórnum
04.05.2015Siðast liðið fimmtudagskvöld fór fram í Kórnum úrslitaleikur í Lengjubikar kvenna árið 2015 og voru það stelpurnar okkar í Breiðablik og Stjarnan sem öttu kappi. Var mikil spenna í loftinu að sjá hvernig þessi tvö af bestu liðum landsins myndu leggja upp leikinn.
Liðin voru eftirfarandi:
Breiðablik: Sonný Lára Þráinsdóttir (M). Svava Rós Guðmundsdóttir, Málfríður Erna Sigurðardóttir, Jóna Kristín Hauksdóttir, Fjolla Shala, Aldís Kara Lúðvíksdóttir, Rakel Hönnudóttir, Fanndís Friðriksdóttir, Ingibjörg Sigurðardóttir, Guðrún Arnardóttir, Andrea Rán Snæfeld Hauksdóttir.
Varamenn: María Rós Arngrímsdóttir, Kristín Dís Árnadóttir, Telma Hjaltalín Þrastardóttir, Arna Dís Arnþórsdóttir, Elena Brynjarsdóttir, Esther Rós Arnarsdóttir, Sunna Baldvinsdóttir.
Stjarnan: Sandra Sigurðardóttir (M). Ana Victoria Cate, Lára Kristín Pedersen, Sigrún Ella Einarsdóttir, Kristrún Kristjánsdóttir, Anna María Baldursdóttir, Rúna Sif Stefánsdóttir, Anna Björk Kristjánsdóttir, Theodóra Dís Agnarsdóttir, Harpa Þorsteinsdóttir, Írunn Þorbjörg Aradóttir.
Varamenn: Berglind Hrund Jónasdóttir, Björk Gunnarsdóttir, Guðrún Karítas Sigurðardóttir, Sandra Dögg Bjarnadóttir, Heiðrún Ósk Reynisdóttir, Sigríður Þóra Birgisdóttir, Bryndís Björnsdóttir.
Fyrsta færið leit dagsins ljós eftir einungis tvær mínútur og var þar á ferð Fanndís sem náði góðu skoti á markið eftir frábæran sprett Aldísar inn í teiginn, en Sandra í marki Stjörnunnar gerði mjög vel þegar hún blakaði boltanum yfir.
Fyrstu 15 mínúturnar voru annars mjög jafnar þótt Breiðablik hafi verið ívið meira með boltann. Næstu 15 mínúturnar voru eign Breiðabliks sem skapaði sér nokkur úrvalsfæri. Á köflum spiluðu þær dúndur vel, en ekki kom markið. Undir lok hálfleiksins komst Stjarnan meira inn í leikinn og skapaði þó nokkra hættu fyrir framan mark Blika. Þessi hætta varð svo raunveruleg þegar Rúna Sif Stefánsdóttir kom Stjörnunni yfir á 41. mínútu leiksins. Frekar svekkjandi enda höfðu Blikastúlkur fengið mun fleiri færi í leiknum.
Blikastúlkur byrjuðu af miklum krafti í seinni hálfleik og gjörsamlega áttu fyrstu tíu mínúturnar. Mörg færi litu dagsins ljós en boltinn hafði engan áhuga á því að fara inn fyrir marklínu Stjörnunnar. Áhuginn leitaði meira í átt að marki Breiðabliks og svo fór að Bryndís Björnsdóttir skoraði fyrir Stjörnuna á 55. mínútu leiksins. Fékk hún langa sendingu frá Hörpu Þorsteinsdóttur á vinstri kantinum yfir á þann hægri, spretti inn í teiginn og sendi boltann undir Sonný í markinu. Þetta mark var mjög svekkjandi!
Telma Hjaltalín, María Rós og Esther Rós komu inn á í síðari hálfleik. Blikastúlkur reyndu og reyndu en allt kom fyrir ekki og innsiglaði Stjarnan sigur sinn undir lok leiksins með þriðja markinu og var þar að verki Björk Gunnarsdóttir.
Þetta gekk því miður ekki upp þetta kvöldið þótt mjög margt hafi verið jákvætt í leik liðsins. Blikastúlkur stjórnuðu leiknum á löngum köflum og sköpuðu sér færi, en voru óheppnar að skora ekki. Því er spáð að það gangi betur í næsta leik á móti Stjörnunni sem fer fram föstudaginn 8. maí nk. kl. 19:15 á Samsung vellinum í Meistarakeppni KSÍ. Allir á völlinn!