Blikastelpur heiðruðu minningu Valda vallarvarðar með góðum sigri á KR
11.05.2016Löng bið eftir fyrsta leik í Pepsí-deild kvenna var á enda þegar stelpurnar okkar tóku á móti KR í fyrsta leik Íslandsmótsins. Blikum er spáð sigri í deildinni í ár enda frábærlega mannaður hópur í sumar.
Á völlinn voru mættir 612 áhorfendur sem byrjuðu á að heiðra minningu Valda vallarvarðar þar sem lágmynd af honum var afhjúpuð. Virkilega falleg stund á Kópavogsvelli.
Byrjunarlið Breiðabliks: Sonný – Hildur – Guðrún – Málfríður – Hallbera - Ingibjörg – Selma Sól – Fanndís – Svava – Andrea – Rakel
Varamenn: Telma – Arna Dís(79) – Ragna Björg – Fjolla Shala(65) – Ásta Eir – Esther Rós(65)
Leikskýrsla, myndband, myndir og aðrar umfjallanir.
Leikurinn hófst strax á miklu fjöri og nokkuð ljóst að Blikar ætluðu að byrja tímabilið á sigri. Blikastelpur tóku strax öll völd á vellinum og áttu nokkur góð færi á fyrstu 20 mínútum leiksins. Það var í raun bara góður markmaður KR sem sá til þess að Blikastelpur voru ekki komnar með forustu strax.
Á 24. mínútu á Fanndís frábært hlaup upp vinstri kantinn, fer léttilega framhjá einum varnarmanni og setur boltann út á Andreau Rán sem þrumar boltanum í netið. Ekki hægt að segja annað en þetta hafi legið í loftinu.
Blikar héldu svo áfram að sækja það sem eftir lifði hálfleiks en náðu ekki að setja fleiri mörk þrátt fyrir mikla yfirburði. Boltinn fékk oft að ganga flott á milli stelpnanna sem færðu hann ágætlega út á kantana og spiluðu nokkuð vel þennan fyrri hálfleik.
Seinni hálfleikurinn byrjaði eins og sá fyrri endaði, Blikar sóttu. Það voru einungis 4 mínútur liðnar þegar Fanndís fékk boltann rétt fyrir innan miðju, brunaði framhjá hverjum KRingi á fætur öðrum, og endaði með að leggja boltann í markhornið. Frábært mark og staðan orðin 2 – 0 fyrir Blika.
KR-stelpur voru varla búnar að jafna sig á marki Fanndísar þegar boltinn barst hátt í loftið inn á Rakel sem tók boltann snyrtilega með sér og lagði hann framhjá markmanni KR. Einungis 2 mínútur á milli marka og staðan orðin 3 – 0.
Leikurinn róaðist nokkuð næstu mínúturnar en Blikar samt alltaf með öll völd á vellinum. Það var svo á 63. mínútu sem Rakel vann boltann af mikilli hörku af vörn KR, renndi boltanum inn í teig á Andreu Rán sem fíflaði varnarmann áður en hún renndi boltanum í markhornið af miklu öryggi. Andrea Rán í miklu stuði og skorar og skorar þessa dagana. Staðan orðin 4 – 0 fyrir Blika.
KR stelpur náðu svo að klóra aðeins í bakkann með ágætis marki þegar þær fóru upp hægri kantinn, sendu fína fyrirgjöf fyrir markið þar sem Eydís Lilja setti boltann viðstöðulaust framhjá Sonný í markinu.
Í uppbótartíma fékk Andrea svo dauðafæri en setti boltann í slánna, hefði verið gaman að kóróna mjög góðan leik með þrennu.
En það fór svo að dómarinn flautaði til leiksloka og endaði leikurinn með öruggum sigri 4 – 1 og var Andrea Rán valin maður leiksins.
Þessi fyrsti leikur hjá stelpunum lofar mjög góðu fyrir sumarið og frábært hvað margir mættu til að styðja stelpurnar.
Næsti leikur er svo á móti FH stelpum og fer hann fram í Kaplakrika þann 18. maí. Kl. 19:15.
Nú er um að gera að mæta á völlinn og styðja stelpurnar okkar.
Áfram Breiðablik!